Салбанская сельская библиотека

Эбээ — сиэн оҕо саамай сөбүлүүр киһитэ. Эбээ, эһээ курдук күндү дьон сиэннэргэ арааһа суохтара буолуо. Олоҕу олорон кэлбит дьон буоламмыт эдэр кэнэҕэски ыччаттарбытыгар, кэскиллэрбитигэр тугу билэрбитин, билбиппитин кэпсээн хаалларар ытык иэспит буолар. Олох салҕанан, оҕуруолуу тиһиллэн барарын биһиги саастаах дьон ситимин быспакка салгыыр эбээһинэстээхпит. Ону хайдах гынан оҕолорго тиэрдэбит диэн сыалтан «Эбээ үөрэҕэ» диэн тэрээһин (проект) толкуйдаан ыйын ахсын, нэһилиэкпит саха балаҕаныгар оҕолорбутун мунньан тэрээһин ыытабыт. Салайааччы уруккута уһуйаан иитээччитэ Зинаида Петровна Сивцева тэрийэн ыытар. Манна баҕалаах эбээлэр кэлэн кыттыыны ылаллар. «Олох» диэни билбэт оҕолорбутугар араас өрүттээх сэлэһиилэр,призентациялар, оонньуулар буолаллар. Бүгүҥҥү Кулун тутар ыйбыт — сиэрин, туомун, кэтээн көрүүтүн З.П.Сивцева кэпсээтэ. С.К Нератова Охлопкова С. М ,, Былыргы өбүгэлэрбит олохторо,, кинигэтин билиһиннэрдэ. Былыргы саха ыалын олоҕун кэпсээтэ. Полина Михайловна олохтоох уһуйаан ииьээччитэ Кыайыы 80 сылынан Ветеран буойун саллаат аҕатын Михаил Прокопьевич туһунан, олус үчүгэйдик, призентациялаах кэпсээтэ. Ийэтэ Елизавета Алексеевна 14 саастаах кыыс Чурапчы көһөрүүтүгэр эбэтинээн хайдах курдук ыарахан олохтон тыыннаах ордубуттарын туһунан сэһэргээтэ. Аҕатын, ийэтин туһунан ахтыы кинигэлэрин көрдөртөөтө. Ол кэннэ хамаанданан оонньуу оонньотто. Эбээлэр Зинаида Ивановна,Зинаида Петровна, Анна Петровна итии үүттээх чэйинэн, убаһа хаанынан, хартатынан, арыылаах алаадьыннан, минньигэс лэппиэскэннэн күндүлээтилэр. Остуол тула чэйдии олорон, таабырын таайтардыбыт, тургутук оонньоттубут. Хас оонньууларын ахсын оҕолорбут бириис ылан үөрдүлэр-көттүлэр. Маннык тэрээһин оҕоҕо саастаах дьону убаастыырга, ытыктыырга, кинилэр олорбут олохторун сыаналыырга, билиилэрин хаҥатарга олук уурара биллэр.