Салбанская сельская библиотека

Быйылгы 2024-25 үөрэх сылыгар нэһилиэк балаҕаныгар Зинаида Петровна Сивцева төрүт олохпутун, сиэрбитин-туоммутун үйэтитэр сыаллаах оскуола оҕолоругар «Эбээ үөрэҕэ» диэн итэҕэл үөрэҕин үлэлэтэн саҕалаабыта. Хас ый ахсын ыйдар сиэрдэрин, туомнарын үөрэтэн, өбүгэ оонньуутун оонньоон, аһы астаан көрдөрөн үөрэтэллэр. Нэһилиэк эбээлэрэ оҕолорго кэлэн билиилэрин үллэстэллэр, үөрэтэллэр, сүбэлииллэр. Олунньу Одун Хаан ыйдааҕы «Эбээ үөрэҕэр» алта эбээ кыттыыны ыллылар. Эбээ Зина Одун Хаан ый бэлиэлэрин, сиэрин -туомун кэпсээтэ, Эбээ Настя (Протопопова А.М Уһуйаан салайааччыта) оҕолорго Харысхал оҥорорго Маастар кылаас биэрдэ. Эбээ Саргы (Нератова С.К. библиотекарь) ,,Иччилэр» тустарынан кэпсээтэ. Саха тылын төһө билэҕит?диэн Тургутук оонньотто, Эбээ Наташа (Петрова Н. П газоператор) алаадьы охсон оҕолорго алаадьы буһаттарда, минньигэс алаадьынан күндүлээтэ. Саха тылын учуутала Т.В.Касьянова Улуу Кыайыы 80 сылынан Фронтовик суруйааччылар тустарынан кэпсээтэ. Ыйытыктарга эппиэттээтилэр. Бүтэһигэр балаҕан хаһаайкалара, эбээлэр А.П.Третьякова, А.П. Сивцева үүттээх чээйинэн, буотарах миининэн күндүлээн бука бары остуол тула олорон минньигэстик аһаатыбыт, сэһэргэстибит. Оҕолор бу Эбээ үөрэҕин олус сөбүлээн сылдьаллар. Оҕолорбут төрүччүбүт үгэстэрин, хайдах, туох олохтоох олорбуттарын, сиэрдэрин-туомнарын биллэхтэринэ Саха омук үйэлэргэ эстиэ суоҕа. Эһээлэр, Эбээлэр Өбүгэбит үгэстэрин умнубакка, сүтэрбэккэ кэлэр кэнчээри ыччаттарбытыгар тарҕата туруоҕун.