Киһи биирдэ олорор, Олох биирдэ бэриллэр. Өбүгэлэрбит этэллэрин курдук» Киһи олоҕо түннүгүнэн чыычаах көтөн ааһарын курдук» диэбиттэрэ, кырдьык даҕаны сөпкө да тэҥнээн, холоон этэллэр эбит. Хас биир олорор, олорбут , олорон ааспыт киһи олоҕо бэйэтэ туспа история буолар. Туспа суоллаах-иистээх, дьиктилээх. Олорбут, олорон ааспыт олох историятын дьиктилээх кырдьыгын кэнэҕэски кэлэр дьоннорбутугар, ыччаппытыгар хаалларар сыалтан , Салбаҥ нэһилиэгин бэтэрээнин сэбиэтэ уонна библиотеката «Олох кырдьыга..» видеоархив материал оҥорор сыал-сорук ылынаммыт үлэбитин саҕалаатыбыт. Төрүччүттэн төлкөлөнөн, Айыыһыттан айыллан кэлбит дьон буоларбыт быһыытынан,төрүччүбүт олоҕуттан, төрөппүттэрбит удьуордарын ууһатар, үрдүк ааттарын ааттатар дьон буоламмыт кинилэр дьиҥнээх, кырдьыктаах олохторун историяҕа кэпсээн хаалларар сыаллаахпыт. Хас биир киһи олорон ааспыт олоҕо бэйэтин сыаннаһа, кэрэтэ, үтүөтэ, күндүтэ буоларын умнуо һуох тустаахпыт. Ааспыт олоҕу ырытар, баһааҕырдар, куһаҕанын була һатаан кириитикэлиир ол биһиги сыыһабыт буолар. Кэм кэрдиис барыта бэйэтэ туспа кэрэлээх буолар. Ону кытары бары сөпсөһүөхпүтүн эрэ наада. Ханнык баҕар киһиттэн ыйыт оҕо сааһын, эдэр сааһын, ааспыт сылларын син биир күндүтүк саныыр, ахтар, сыаналыыр. Ол иһин оҕолоругар, сиэннэригэр кэпсээн хааллардыннар диэммит Видеоархив устан, тиһэн, оҥорон хаалларарга үлэбитин саҕалаатыбыт. Улуу Аҕа дойду сэриитэ түмүктэммитэ 80сыла туоларынан, билигин баар ветеран оҕолоро, кинилэр тыыннаах туоһулара эһэлэрин, аҕаларын, дьоннорун, аймахтарын хорсун буойун быһыыларын, тыылга үлэлээбиттэрин, ааспыт ыар олохторун кэпсээн, уһуллан хааллардахтарына бу олох улахан сыаннаһа буолуо этэ. Ону өйдөөн, сөбүлээн дьон сэҥээрдэ. Үлэбит олоххо киирбититтэн үөрүүбүт, махталбыт муҥура улахан.
Если вам понравилась статья, не забудьте нажать на
сердечко
